Ram a thang zél a, a mi chêngte pawh kan changkang tawlh tawlh a, kan ram ngei pawh hian kawng tam takah hmasawnna rahbi a rap chho ve mêk zel a. Chutih lai chuan MIZOTE pawh changkanna khawvel chuan min nang chho ve zel a, min chiah piah ve zel a, kan awmna khawvel leh leilung piankenin a herchhuahpui a nih miau avângin chu hmasàwnna chuan min kal kan thei bîk lo a ni.
Chu hmasàwnna kan tih chuan thil tha hlir chu a rawn her chhuahpui bîk hauh lo mai. Thil tha tam tak a rawn herchhuahpui rualin chumi karah chuan a tha lo zâwnga hman theih tur thil a rawn tel ta nuk mai thin a. Chumi thliar hrang thiam a, lo hrethiam zat zat thei tur leh chu thil tha lo laka inveng thei tur chuan keimahni theuh hi kan in enfiah a tul hle mai.
Changkànna kan tih hi thil inthlakthleng, nunphung inthlak thleng tih hian kan hrethiam mai àwm e. Chu changkànna chuan kan inchei duh dàn thlengin hmasàwnna, danglamna nasa tak a rawn thlen a. A bik takin thalaite zingah a nasa èm èm a ni.
Tun hma kum 10 kalta vèl kha chuan thalai zingah inchei danglam deuh hmuh tur an awm vak lo, incheina a lo inthlàk a nih pawhin a rualkhai, a inang tlang (Uniform) a ni deuh zel a, incheina uchuak èm èm a awm lo. Tlangval pakhatin Puma pheikhawk a bun chuan a dang pawhin an bun mai a, kekawr mawng a bel chuan chutiang bawkin.
A bik takin sam enkawl leh chei kual dànah hian kan danglam nasa ta hle. Tun hma deuh kha chuan tlangval pakhatin a lu a rawn mèt kawlh tul a, khawlaia a rawn lèn chhuah chuan, “Lu kawlh, lu kawlh ka thangah awk awk” kan ti luai luai thin a, pangai lo taka lu meh kawlh pawh ngam awm loh khawpin kan in au thin kha a ni a. Tunah chuan a ni ta hauh lo mai. A duhin an ziat kawlh a, a duhin kawlh lek lekin, a thenin an lo zuah bawk. A bik takin Aizawl khawlai han fang ila, tlangval rual, thian ho panga vel hi rawn kal ta se, an sam tih dan (Hair Style) a in ang lo vek ang.
Tin, hmeichhe lamah han pakai ta i la, a then a eng, a sen, a kir, a zum, a kum, a kual vel nuaih vek mai. A thenin kekawr, Jeans, a kap tawi, a kap fual, a hmawr arh, zuih, thleh, ngalrek china thleh chenin a in kalh nuk tawh mai. Mawngbawr nalh vak lo leh ding chung pawha e pherh zo lo turte pawhin mawngbawr in thial sawi tawlh tawlh khawpin kekawr an ha hreh chuang lo. Kan chenna leilungin a mil em tih lam ngaihtuah miah loin, khawi maw laia a\anga an hmuh ang lai leh dul langin, pheikhawk ke-artui sang nen he kan chenna kham ko chhengchhe takah hian min han in-tihtheih khum vel rawl nen !
He’ng zawng zawng kan sawi hian thil lo lang chiangta em em mai chu, tumah kan insawisel lo a, an hair style emaw, a kekawr hak dan emaw, a pawnfen fen dan emaw chenin kan in sawisel tawh lo. A mimal nun a ni a, ka mi mal nun a ni a, tumah mi nunah kan in rawlh tawh lo. Keimahni theuh kan in ngai pawimawh vek tawh a ni. Hmeichhe ho pawhin mi an rel peih ta meuh lo. Privatisation khawvelah kan cheng miau a.
Mi inchei dan ka va sawisel khan hlawkna mi pe lo a, an theng-thawngah a lut bawk hek lo. Engkim mai hi mahni vek a ni ta. Zalenna duh vang leh chep intihna avanga min veng himtute leh kan thattlanna tur ngaihtuahtute tihluhaina khawvelah hian Over mai ni lo, Over Bon Top nunah kan cheng ta.
Kan hmanalai nun hluiah kir leh ang u tihna lam ni lovin, heng changkanna lo thleng leh khawsak dan inthlakthleng hi a lo thleng ve tur reng chu a ni, kan doin kan duhlo hauh tur a ni lo. Chutih rual chuan a lo dawnsawn dan tawk kan thiam erawh chu a ngai a, ka tih a tan, mizo ka ni a, mizo nula leh tlangval tan hetiang thil hi tih ve vek a mawi em tih kan chhut chian a ngai hle. Ram changkang ten eizawnna atana Modeling an hman laia tute emaw reality show avanga an lo hlawk tak viau avanga Model pangai awmlohna hmun atanga Super Model vawrh chhuah tum tlat hi thil tih awm reng a ni em ?
Kohhran lam han hrut tel ta ila. Tun ang zel a kan kal chuan Mahni Kohhran bila Pastor neih te hi kan la ti lo ang tih a sawi theih miah loh. Kan duh zawng leh kan thuhnuai a kan dah theih tur, Synod atanga hlawh pek ngai lo, mahni Kohhran atanga hlawh pek tur Pastor kan neih hun hi a thleng lovang tih a sawi theih miah loh. Kan thawhlawm han en ila, Synod lama lut chu a ngaiin a kal a, tualchhung Kohhran enkawlna tur erawh chu a kum tin deuh thawin tu Kohhran pawh hian Head kan siam belh zel a, Synod lama sum lut aiin Tualchhung Kohhrana lut a pung tual tual a ni lo’m ni ? Kan sawisel a ni hauh lo, hei hian mahni Kohhran in lak bingna leh heng hmanga a hranpaa rawngbawltu, kan duh bik te rawih duhna rilru a lo chhuak thei tlat.
Mahni Bialtu Pastor nei reng chung siin, mi thiam deuhte tih vangin pawn lam mi rawngbawltu atan kan han ruai tlat duh mai te, retreat leh eng emaw ang hunah te pawh kan Pastor-te aia mi dang kan chaw lut duh tlat mai te hian a hmunpui lamin min enkawl tura an rawn dahte hi kan ring zo ta lo em ni a tih theih.
Kristian ram kan in ti a, a dik pawh a dik. Amaherawhchu, thil zahthlak tak tak, kristian ram ni si tana mawilo a va tam em ! tun hnai thil thlengah han chhui ta I la. Oil phur Motor an nawrh avangin a ram pum buaiin kan buai a, kan tam lo chauh a ni mai si a. chutiang zelin, kan ram intodelhna tur kawng kan zawng a, a ni lo lamah a kal zel si.
Kan thalaiten an duh anga zalenna an hmu tawk zo tawh lo a, kan nu leh paten kan tihtur chin kan hre tawh lo a, kan Political Party hruaitu ten enge kan tih an chhut si-se tawh lo. Kan NGO hrang hrangte pawhin an huang chhung pelin an kuang lo nawr ngaih a tul chin a awm ta. Chutih laiin kan ram boruak pawhin awmngaihna a hre lo, kan sik leh sa pawhin a hunbi pawh a chhiar dik thei meuh ta lo.
Mi awm-eute lansarhna khawvel, mi baka huam hauhte dinchhuahna khawvel, mi chapo leh zaktheilote larna khawvelah hian mi dik leh inthlahrung, ngawi renga dikna humhalh tlat tute nek chep an ni a, dikna aia thiltihtheihnain thiam a channa khawvelah hian, ngawi renga rinawm taka kan ram thatna ngaihtuahtute dinchan hun tur a nghahhleh awm hle mai.
Heng chih-chawm taka kan han sawi tak nuaih atang hian mizote hi khawiah nge kan awm a, eng dinhmunah nge kan din tih kan inngaihtuah chian a tul ta hlein a lang.
No comments:
Post a Comment